فتنة الحفل زيـدي مشيتـك بختـره=كل خطوه بروق وكل لفحـه صهيـل
باقيٍ بين عقلـي والجنـون شعـره=اقطعيها يا شينه عاشقٍ مـو هبيـل
خلّي الأرض تاخذ شكـل غيرالكـره=خلّي النار تاخذ رمـز غيـر الفتيـل
من غدا الليل شعرك قلت أنا بأسهره=من غدا الصبح خدك قلت مالي مقيل
ارقصي بين حـد الذنـب والمغفـره=ارحلي في سكونك واسكني في الرحيل
ارجفي كنـك المـا فززتـه حْجَـره=واثبتي كنك الفضـه بعيـن البخيـل
انحني مثل غصنٍ في طرفـه ثمـره=ووقفي مثل فزعـات بـدويٍ أصيـل
وانضحي علمينا كيـف تقـدر مـره=تزرع الليل صبح وتزرع الصبح ليل
في عيونك سـوادٍ يستحيـل آخـره=كامنٍ فـي بيـاضٍ أوّلـه يستحيـل
واحدٍ تخزريـن ومـا يجيـك خْبَـره=أشهد إنه عزيزٍ وأشهـد إنـه ذليـل
اتركي العقد بيـن الجـد والغشمـره=يخبر الناس وش معنى جميل بْجميـل
كن في الصدر ظبي عيوننـا يذعـره=ينتفض ينفض اللي ذاعرينـه قبيـل
ومفرق الصدر حبات العرق تجهـره=كن لك عقد در وعقد مـن سلسبيـل
بينهم حسد ربـي مـا بعـد صـوّره=عقد ودّه يجـف وعقـد ودّه يسيـل
آه وليـا لمحتـه مقبـلـه مـدبـره=شفْت مثلي نحيـلٍ زم حمـلٍ ثقيـل
دام ذا عجْز وش للنـاس بالمقـدره=دام ذا وسط وشْ لي بالخواتم بديـل
وسط ثوبٍ خيوطه صمت في ثرثـره=به قليـل كثيـر وبـه كثيـر قليـل
كل شيٍ بجسمـه يفضحـه يستـره=فيه فتنة قصير وفيه حشمـة طويـل
كنه المخطي اللـي يطلـب المغفـره=وكنه الدامح الزّله عـن اللـي يعيـل
في ردونـه نقـوشٍ لا سنابـل ذره=الله أعلم لو إن الريـح هبّـت تميـل
كل شيْ ونقيضـه فيـك بالمسطـره=أقرب من النفَس وابعد من المستحيل
كنّك الكـذب لكـن مـا حـدٍ ينكـره=كنك الصدق لكن مـا بيديْنـا دليـل
باشة الغيد زيـدي مشيتـك بختـره=لا جل أطاول بحر في شامخات النخيل
شاعرٍ تلمس إيدينـك علـى دفتـره=تغرق بأبسط أوزانه بحـور الخليـل