|
من نوادر الشاعر سعود جمعان المطيري
الشاعر سعود جمعان المطيري من الشعراء المبدعين
طبعا الموضوع منقول والكلام للراوي المنقولم منه وهو صديق لي وقد حصل له موقف مضحك قبل فترة قصيرة يقول سعود إنه وهو بالمسجد بعد ماسلم الإمام قام شحاذ يشتكي أموره على المصلين لعلهم يساعدونه وهو يتشكى كان مركز بعيونه على سعودجمعان قال له سعود هالأبيات: يا ابن الحلال اللي تشكى علينا حنّا لنا بوضع علىالله مشاكيـه كانك تحرى للعطا مـن يدينـا عزالله إنك عندنا ما أنت لاقيـه ماهو ردى بس أرثع الوقت فينا ماعندنا ماناكلـه دون نعطيـه ومرة كان سعود جالس بمجلس وكان فيه شيخ يحدث ويقول من ضمن الحديث إننا بأعظم نعمة بتاريخ البشرية قال له سعود : ياشيخ أنا عندي مداخلة قال له الشيخ تفضل قال سعود هالأبيات: ياشيخ .... الضحى فوق ثوبـك وانته تروغ عن نحور الصواريخ النعمة اللي بس ياشيـخ دوبـك ماتحسب أكبر نعمـة بالتواريـخ وإن كان هذا بالتحدث أسلوبـك فعز الله إنك لقطة غليس ياشيـخ وزماااااااااااان كان سعود طالع من المسجد ولقى وحدة رافعة يدها وتشحذ عند الباب قال لها سعود: يابنت ياللي بالمساجد تطوفيـن كفي يدينك قبل نأخـذ ريالـك حنـا ترانـا كلنـا مستحقيـن ماهو أنتي اللي مستحقة لحالك لو لا الحيا شفتي وزانك ثلاثين أحد يمين منك وأحـدٍ شمالـك مرفعيـن إيديننـا ومتقاعيـن الموجب إن أحوالنا مثل حالك ومرة بعد جا سعود وفتح له حساب وراح بعد كم يوم يبي يشوف كم في رصيده لأنه مرررررررة مطفر وش طلع له على شاشة الصراف ؟ مع إنه متأكد من رقمه السري أنـا لقيـت البنـك مثـل اخويايـه مايقضي الحاجة إلى جـاه محتـاج أمس الضحى مريـت كـل زملايـه وكلٍ عطـى لـه بالمعاذيـر منهـاج وضنيت باقي فـي رصيـدي بقايـه وحركت ناصٍ حارس البنك هجـاج ودقيت رقمـي صـح مابـه روايـه طلع على الشاشة : لا داعي للإزعاج وسعود ما عمره دخل البنك لأنه يقول يا أهل الوظايف قولوا الحمـدلله على معوشتكم ولو رزقها ضنـك أنا وجنسي رزقنا لـو وصفنـاه حوذ الحنك مافيه زودٍ عن الحنك ماطاح قرشٍ في يدينـا قرشنـاه ودايم طفارى الله يجيرك ويامنك البنـك لـولا لوحتـه ماعرفنـاه من قل ماندخل على موظف البنك ماغيـر نقـرا لوحتـه ونتعـداه وإن قيل هذا البنك قلنا اتركه عنك لاوا هنيـك يالغنـاوي هنـيـاه ترقـد وحنـا بالدراهـم نمونـك نفرح إلى من المعـاش استلمنـاه ويهـج منـا قرشنـا ويتزبـنـك والله يالو تصرف ربع ماصرفناه ليصيبك السكر مع الضغط والتنك ولولا جهدنا وجهدنا اللي بذلنـاه ماتنفخ ذروبك وتمـلأ مخازنـك مير المقدر مالنا غيـر نرضـاه مرزقك منا وسقمة أرقابنا منـك طبعا والشاعر سعود جمعان المطيري هو صاحب القصيدة اللي يرددون الناس بيتها الأول دايم والقصيدة هي لاصار جدك ماترك لـك ملاييـن ماهوب لازم تشتري لـه ضحيـه قل له ياجدي جعلك من المناجيـن والله ماتسـوى قيمـة البربـريـه عقبتني للديـن ومصـارع البيـن ومن زين طبعك كاتبٍ لك وصيـه؟ لو أنت ما أخذ لك من الخد حوشين يوم الأراض بلاش وسـط العليـه إن كان تلقاني من أهـل الدكاكيـن مطنطـخٍ هالحيـن ميـة بمـيـه لكـن ياجـدي ضحيتـك بعـديـن إن سهـل المولـى ثمنهـا عليـه حنا بوقتٍ شين وأشين من الشيـن فيه الخـوي ماعـاد ياثـق خويـه |
الله يعطيك العافيه يابعيد
على النقل المميز هزلي هالشاعر وله قصائده انتشرت بشكل ملحوظ بس قصائده دائما تميل الى الماده؟؟؟!! تحياتي لك |
محبا اخوي بكيفي.
نعم هالشاعر هذا بكل قصائده يشكو من نقص المادة ويبدو ان حالته الماديه سيئة. شكرا على مرورك. |
لاهنت عالنقل يبو سعوود........؟؟
ومثل ماقلتوا شكله يشكوا من الحاله الماديه وقصايده انتشررت مع العالم وشكرااا.....؟؟؟؟ |
شكله ماادي صج
؟؟؟ بس يمكن لجماال هالاسلووب انتشرت هالنوعيه من القصييد الهزلي واكيد شاااعر بهالاسلووب والتمكن يطلع منه الكثييييييييييييير بموااضيع ثاانيه بس اتوقع بحثنااا عن النكته والاسلووب الي يرفه عنااااا انتشرت هالابيااات بشكل كبيير بالمنتدياات والمسجاات والبلووتووثااات بعد .................................................. بعيد مميز اخووي دااائماااا شكراا لك |
مرحبا اخوي راعي الوضحاء
ومرورك مميز خيوووو وبالنسبه للشاعر هذا مايحتاج معروف انه مرثعتن فيه الحاجه. |
عافاك الله اخوي بعيد على هالنقل الطيب
وبارك الله فيك وشهادتي فيك مجروحه يا خووك تقبل مروري وتحياتي وتقديري وفوقهن ودي واحترامي اخوووك الجارح |
اهلين جمررررره
ومررراحب الشاعر سعود الهاملي بالنسبه للشاعر هذا المعروف عن قصائده المشهوره تحاكي واقعه الذي يعيشه, هو اللي يقول البنك لولا لوحته ماعرفناه. وهو اللي يقول لاصار جدك ماورث لك ملايين. صحيح ان قصائده فيها شيء من الفكاهه ولكن يتحدث عن واقعه, |
أخوي العزيز الجاارح المتميز. شكرا لمرورك الجميل, ولكلماتك الرائعه. |
يعطيج العافيه ومشكوره
شجاع الهيت |
| الساعة الآن 07:23 PM. |
Powered by vBulletin® Copyright ©2000 - 2026, Jelsoft Enterprises Ltd. , TranZ By Almuhajir
جميع المشاركات المكتوبة تعبّر عن وجهة نظر كاتبها فقط . ولسنا مسؤلين عنها بأي شكل من الأشكال .
