ياراعي البترول قرب هنا عب=عب البيوك اللي توليت عبه
وآخذه وجيك ناقص زيوته وصب=ومنين مايقبل به الزيت صبه
جيك تراني ناوي له على نب=درب ثلاث شهور ماني بنبه
عل وعسى ياكود ياليت يارب=يارب موضوعي يخلص ياربه
قد لي وانا قلبي من الشوق يشتب=يشتب من سبه ومن غير سبه
وانا عذابي في الهوى كل ماهب=يزداد شوقي لاتغير مهبه
واسير خطوه وآقف شوي وآخب=وآنزل من المشراف وارجع وآّذبه
وآطيح لي في علة مالها طب= وامشي مع العالم وقلبي مسبه
بآسباب منهو يخطف الحال واللب=ويروح الرجال من دون لبه
اللي جذبني له وانا جيت منصب=وماعاد لي منه وعنه مغبه
ومحبته ماهي مع كل من هب=نذر على رقبتي نذر ماتشبه
ارهى علي بالحب وارهيت بالحب=ويحب حبي مثل ماحب حبه
ويهدي لي لبيه ماقلت له لب=وقلبي يقول ان قال لبيه لبه
واقول يالبيه ويقول لي (جب)=وصدقت من قال المسبه محبه
وراحت علاقتنا كذا سب في سب=واللي يحب اكثر يزيد المسبه
وماودي ابطي عنه واصد واغب=من خوفتي من قولة ان صد كبه
ودام البيوك مشيك وصاير (توب)=ويطير بي حبه ويرتاح حبه
ياراعي البترول عجل علي عب=يارب موضوعي يخلص ياربه

اخــت القـــمر