يطول الليل والشرهه على مسراه = وعذره فالبطا ليلته شتويه
سرا وليا سرا كلٍ على ليلاه = يغني مع طواريق الهواويه
وانا غنيت والشاعر يزين غناه = ليا منه تذكر حلو ماضيه
من الايام واللي ماقدر ينساه = معه لو صفحة الايام مطويه
ذكرتك يابعد فقر الهوى وغناه = وضميتك والمشاعر منك مرويه
وردت ولا وصل للشوق حبل رشاه = ولا بل الظمـا ذكرك وطاريه
وليفك ياوليفه مايبل ضماه = سوا شوفك ولو ماللزمن نيه
رحلت ولا بقى غير القصيد انصاه = ولا عندي سوا الشعر وقوافيه
اغنيبه شجن ويشوقني مغناه = واثر بعض البيوت ترد عكسيه
من الايام قلبي جاه ماكفاه = ولا باقي لقلبي غير امانيه
وانا باقي على الحب وعلى ذكراه = ولو ان الفرح شحت مساعيه
مدام الوقت شح بمدته وعطاه = اجل حيل الله اقوى ويش بيديه

الموضوع الأصلي: يـطول اللـيل !! || الكاتب: أحمد المجاحمة || المصدر: منتدى الجبلان الرسمي

المصدر: ::منتدى الجبلان الرسمي::