كان يامنصور ابوك الصبح هـاوي =للمـراح ولا يـردنـه ظـروفـه
قله اني مع صـلاة الصبـح نـاوي =اعطي الفكسار ليـن اكتـم بلوفـه
وان غدى للسير والمكـره تعـاوي =ما على المشوار والطرقه حسوفـه
مانقيّل غير فـي بيـت الجـلاوي =بيت عـود ٍ ماتريـح ليـن اشوفـه
شوف ابويه مايجي لـي بالمنـاوي =شوف من يفرح ليا كثـرو ضيوفـه
ودي اسلمّ علـى الحـر النـداوي =واتعـذر منـه واقـبـل كفـوفـه
لي شهر وانا على شوفـه شفـاوي =بس وقتي ويش اسوي في صدوفـه
كل ماينحي بـي الوقـت النحـاوي =اتحـرى ساعـة ٍ فيهـا نكـوفـه
يم ابـوي ويـم مخلفـة الهقـاوي =البكار اللي لهـن نفسـي شغوفـه
ماحـلا قدامهـن جـر الغـنـاوي =لاكثح بـرق الحيـا وارزم قنوفـه
ماقهرناهن علـى الـواد السنـاوي =فاول الوسمي وفي مقـدم صيوفـه
الربيع ادنـى المرابيـع الصـداوي =والعقوم اللي على الحـد معروفـه
وكان جا للصيف في الميثب حراوي =فالجنـوب اللـي مواريـده كلوفـه
قطفة الزملوق والعـود الطـراوي =شـف ذود ٍ مانـرده عـن شفوفـه

الموضوع الأصلي: من روائع سلطان الجلاوي ..! || الكاتب: " فهد الجبلي " || المصدر: منتدى الجبلان الرسمي

المصدر: ::منتدى الجبلان الرسمي::